Na i Beilonau Dyffryn Tywi!

Crëwyd y grŵp hwn i fod yn llais i gymuned Llanymddyfri a’r ardaloedd cyfagos wrth wrthwynebu cynigion Bute Energy/Green GEN Cymru i godi dros 60 o filltiroedd o beilonau trydan i gysylltu Parc Ynni Nant Mithil yng Nghoedwig Maesyfed, Powys ag is-orsaf newydd gan y Grid Cenedlaethol ger Llandyfaelog, rhwng Caerfyrddin a Phont Abraham.

Rydym yn llwyr gefnogi ynni adnewyddadwy ond nid ydym yn credu y dylid ei ddatblygu ar draul yr amgylchedd lleol a’r bobl sy’n byw ynddo. Mae yna opsiynau gwell!  Er mwyn lleihau eu heffaith, credwn y dylid tanddaearu pob llinell drydan newydd gan ddefnyddio'r dechnoleg sydd ar gael ar gyfer aredig ceblau a/neu ddrilio.

Mae’r grŵp yn annog Llywodraeth Cymru i ymgysylltu â chymunedau ac i ddefnyddio dull cyfannol o ymdrin â’r rhwydwaith trydan yng Nghymru er mwyn sicrhau y gall yr ynni gwyrdd a gynhyrchir yng Nghymru gael ei ddrefnyddio ledled Cymru i geisio cyflawni nodau sero net. Dylai Llywodraeth Cymru anelu at annog y broses o uwchraddio'r seilwaith presennol i fodloni'r galw yn y dyfodol a, lle y mae angen seilwaith newydd, dylai sicrhau cydbwysedd rhwng budd ac effaith.